شیخ الازہر: ہم یمنی عوام کے دکھ درد کو محسوس کرتے ہیں، ان کی مشکلات کو سمجھتے ہیں اور دعا کرتے ہیں کہ اللہ تعالیٰ ان کی جلد بحالی اور ترقی فرمائے۔

شیخ الازہر: الازہر یمن کے فرزندوں کے لیے ہر طرح کی علمی اور دعوتی  معاونت فراہم کرنے کو تیار ہے۔

وزیرِ اوقاف یمن: یمنیوں نے اعتدال اور رواداری الازہر کے علما ہی سے سیکھی ہے۔

عزت مآب امام اکبر پروفیسر ڈاکٹر احمد طیب، شیخ الازہر شریف نے مشیخۃ الازہر میں یمن کے وزیرِ اوقاف و ارشاد ڈاکٹر محمد بن عیضہ شُبیبہ کا خیر مقدم کیا، تاکہ یمن کے عوام کے لیے ازہری تعاون کو مزید مضبوط بنانے کے امکانات پر تبادلۂ خیال کیا جا سکے۔

شیخ الازہر نے یمن اور اس کے عوام کے ساتھ الازہر کے گہرے رشتے کا ذکر کرتے ہوئے فرمایا کہ الازہر یمن کے عوام کے دکھ درد کو اپنا سمجھتا ہے اور دعاگو ہے کہ اللہ تعالیٰ جلد اس ملک کو استحکام اور عافیت عطا فرمائے۔ انہوں نے رسول اکرم ﷺ کی حدیثِ مبارکہ کا حوالہ دیا: "تمہارے پاس اہلِ یمن آئے ہیں، جو نرم دل اور رقیق قلب والے ہیں؛ ایمان یمنی ہے اور حکمت یمنیہ ہے۔"

انہوں نے واضح کیا کہ الازہر یمن کے فرزندوں کے لیے ہر طرح کی علمی اور دعوتی معاونت کے لیے تیار ہے، جس میں یمنی طلبہ کے لیے وظائف میں اضافہ بھی شامل ہے۔ پچھلے سال الازہر نے یمنی طلبہ کو 185 وظائف دیے، اور اب مزید وظائف دینے کے لیے تیار ہے۔ اسی طرح یمنی ائمہ کو الازہر انٹرنیشنل اکیڈمی برائے تربیت ائمہ ووعاظ میں مدعو کر کے ان کی تربیت کی جائے گی تاکہ وہ علمی و فکری سطح پر یمن کے علما کے درمیان اتحاد اور ہم آہنگی قائم کر سکیں اور عوام کو علم و حکمت سے فائدہ پہنچا سکیں۔