عزت مآب امام اکبر پروفیسر ڈاکٹر احمد طیب شیخ الأزہر، نے  پیر کے روز سفیر یاسر شعبان، معاون وزیر خارجہ برائے ثقافتی تعلقات، جناب محمد جمال، مصر کے نئے سفیر برائے مالی، اور سفیر احمد فرید، نائب معاون وزیر خارجہ برائے ثقافتی امور کا استقبال کیا۔ ملاقات میں افریقہ میں تعلیم اور تبلیغ کے شعبوں میں أزہر شریف کے کردار کو مزید مستحکم کرنے کے طریقوں پر گفتگو کی گئی۔

عزت مآب امام اکبر نے اس بات پر زور دیا کہ ازہر شریف افریقی براعظم کے مسلمانوں کی مدد کے لیے پرعزم ہے، اس کے ذریعے افریقی ممالک کے مسلمانوں کے لیے مخصوص اسکالرشپس کی تعداد میں اضافہ کیا جا رہا ہے، اور ایسے الأزہری طلبہ کی تعداد بڑھائی جا رہی ہے جو معتدل الأزہری نصاب کو پھیلانے میں مدد فراہم کرتے ہیں۔ علاوہ ازیں، افریقی آئمہ اور واعظین کو الازہر انٹرنیشنل اکیڈمی برائے تربیت ائمہ اور مبلغین میں تربیت دینے کے لیے مدعو کیا جا رہا ہے، جہاں ایسے تربیتی پروگرام تیار کیے گئے ہیں جو ہر ملک کی ضروریات اور داخلی چیلنجز کے مطابق ڈھالے گئے ہیں۔

شیخ الأزہر نے وزارت خارجہ کے ساتھ تعاون کو فروغ دینے کی اہمیت پر زور دیا تاکہ علماء کرام کو روانگی سے قبل تربیت دی جا سکے۔ اس تربیت میں روانہ ہونے والے ممالک کے بارے میں تعارفی خلاصہ فراہم کرنا، زبان اور پروٹوکول کی مہارتوں کا اضافہ کرنا شامل ہو، تاکہ وہ معاشرے کے مختلف طبقات کے ساتھ بہتر رابطہ اور تعامل کر سکیں۔ انہوں نے وزارت کے ساتھ تعاون کی ضرورت پر بھی زور دیا تاکہ غیر ملکی طلباء کو اپنے ممالک کے سفارتخانوں سے جوڑا جا سکے اور ان کی ممکنہ مشکلات کو دور کیا جا سکے۔

عزت مآب امام اکبر نے أزہر شریف کے عالمی منصوبے عربی زبان کو نشر کرنے کا ذکر کیا، جس کا مقصد دنیا بھر میں مختلف ممالک میں عربی زبان سکھانے کے مراکز قائم کرنا ہے۔ الأزہر کو اس پروگرام کے اعلان کے بعد متعدد ممالک سے شاخیں کھولنے کی درخواستیں موصول ہوئی ہیں۔ اس کے علاوہ، "اسلام کا تعارف" پروگرام کا بھی ذکر کیا، جو غیر مسلموں کو اسلام کے بارے میں آگاہی دینے کے لیے ایک تعلیمی نصاب ہے۔ اس پروگرام کا مقصد نہ صرف غیر مسلموں کو اسلام سے متعارف کرانا ہے، بلکہ دنیا بھر میں اسلامی ممالک کے سفیروں کو بھی شامل کرنا ہے تاکہ انہیں اسلام کے اصولوں، اس کے دیگر مذاہب کے ساتھ تعامل کے طریقوں، اور مختلف معاصر مسائل پر موقف کے بارے میں منطقی جوابات فراہم کیے جا سکیں۔

اپنی جانب سے، سفیر یاسر شعبان، معاون وزیر خارجہ برائے ثقافتی تعلقات، نے  شیخ الأزہر کے اس عظیم کردار کو سراہا جو وہ اسلام کی خدمت میں ادا کر رہے ہیں اور دنیا بھر میں مسلمانوں کے مسائل کی حمایت کر رہے ہیں، خاص طور پر افریقہ میں۔ انہوں نے صحیح دین اور اس کی مہذب تعلیمات کو پھیلانے کی اہمیت پر زور دیا، جو امن، اخوت اور مشترکہ پرامن بقائے باہمی کی ترغیب دیتی ہیں۔ سفیر نے وزارت خارجہ کی جانب سے الأزہر کی عالمی سطح پر حیثیت کو مستحکم کرنے اور دنیا بھر کے مسلمانوں کے لیے فراہم کی جانے والی خدمات کو فروغ دینے کے عزم کا بھی اعادہ کیا۔