عزت مآب امام اکبر پروفیسر ڈاکٹر احمد طیب، شیخ الازہر شریف نے مشیخۃ الازہر  میں یورپی یونین کی قاہرہ میں تعینات سفیرہ، مسز انجلینا ایخورست، سے ملاقات کی تاکہ علمی تعاون کو مزید فروغ دینے کے طریقوں پر تبادلہ خیال کیا جا سکے۔

شیخ الازہر نے کہا کہ آج کی دنیا جنگوں اور تنازعات سے بھری ہوئی ہے، جن پر نہ کوئی ضابطے لاگو ہوتے ہیں اور نہ اخلاقی اصول۔ یہ جنگیں انتہائی سفاک ہیں جن میں بچوں اور عورتوں کے قتل، ہسپتالوں، اسکولوں، مساجد اور گرجا گھروں کی تباہی کے لیے کوئی معیار مقرر نہیں۔ انہوں نے زور دیتے ہوئے کہا کہ ان جنگوں کے فیصلے کرنے والے جنگلوں کے درندوں سے بھی بدتر ہیں، بلکہ جانور بھی ایسی بربریت اور خونریزی تک نہیں پہنچے۔ حتیٰ کہ ہم نے "بھوک کا جال" بھی دیکھا، یعنی معصوموں کو بھوکا مار کر انہیں نکلنے پر مجبور کرنا اور پھر نشانہ بنا کر قتل کرنا۔

شیخ الازہر نے مزید کہا کہ غزہ میں قبضے کو ایسی سفاکانہ جرائم، قتلِ عام اور نسل کشی کرنے دینا ایک ایسا جرم ہے جو کبھی مٹایا نہیں جا سکتا۔ انہوں نے وضاحت کی کہ جو قوتیں اسے ان جرائم کو جاری رکھنے کی پشت پناہی کرتی ہیں وہ مادی فلسفوں اور نوآبادیاتی نظریات پر انحصار کرتی ہیں، جو "تہذیبوں کے تصادم" اور "نوآبادیاتی مفروضات" کے نام پر پھیلائے جاتے ہیں، تاکہ فلسطینیوں کے قتل اور ان کی زمینوں سے بے دخلی کو جائز قرار دیا جا سکے۔

انہوں نے اس بات پر بھی افسوس کا اظہار کیا کہ یہ سامراجی رویے بدقسمتی سے بقائے باہمی اور اخوت کی ثقافت کو فروغ دینے کی کوششوں کو نقصان پہنچاتے ہیں، اور مشرق و مغرب کے درمیان حقیقی قربت کی راہوں میں رکاوٹ ڈالتے ہیں۔ انہوں نے کہا: “تمام نعرے جو قربت اور اخوت قائم کرنے کے لیے لگائے جاتے ہیں وہ اس وقت بے فائدہ ہو جاتے ہیں جب طاقت کا تکبر غالب آ جائے۔ ہم یقین رکھتے ہیں کہ آسمانوں میں انصاف موجود ہے اور وہ ضرور آئے گا، اور اس کے مؤخر ہونے کی کوئی الٰہی حکمت ہے۔” انہوں نے سوال اٹھایا: “یہ شیطانی قوت جو باقی تمام قوتوں کو ختم کر دیتی ہے، اس کا راز کیا ہے؟” اور کہا: “ہم مایوسی محسوس کرتے ہیں کیونکہ موجودہ پالیسیوں کی بنیادیں غیر انسانی ہیں۔”

شیخ الازہر نے یہ بھی کہا کہ ہمیں گمان تھا کہ اکیسویں صدی انسان کے لیے   سابقہ صدیوں  سے زیادہ اچھی ہو گی اور  انسانیت کے لیے خوشی، تہذیب اور انسانیت کی اعلیٰ مثال ہوگی، لیکن حقیقت اس کے برعکس نکلی۔ آج کا انسان زیادہ محروم اور حقوق سے عاری ہے، کیونکہ دین اور اخلاق کو پس پشت ڈال دیا گیا ہے اور معصوم جانوں کی حفاظت کے بجائے اسلحے کی معیشت کو ترجیح دی جا رہی ہے۔

اپنی جانب سے یورپی یونین کی سفیرہ نے شیخ الازہر سے ملاقات پر مسرت کا اظہار کیا اور ان کی کاوشوں کو سراہا جو وہ اخوت، بقائے باہمی اور انسانیت کے لیے کام کرنے کی ثقافت کو فروغ دینے میں کر رہے ہیں۔ انہوں نے کہا کہ الازہر اور یورپی یونین کے درمیان مؤثر تعاون موجود ہے، جس کے تحت کئی اقدامات اور پروگرام نافذ کیے گئے ہیں تاکہ امن کی ثقافت کو فروغ دیا جا سکے اور نوجوان قیادت کو امن قائم کرنے میں فعال کردار ادا کرنے کے لیے تیار کیا جا سکے۔ انہوں نے زور دے کر کہا کہ یورپی یونین مستقبل میں بھی اس مثبت تعاون کو جاری رکھنے اور مزید مضبوط بنانے کے لیے پرعزم ہے۔