عزت مآب امام اکبر   پروفیسر ڈاکٹر احمد طیب، شیخُ الازہر شریف نے بروز منگل   مشیخۃ الازہر میں قاہرہ میں متعین مملکتِ سعودی عرب کے سفیر، عزت مآب صالح بن عید الحصینی، کا استقبال کیا۔ ملاقات میں باہمی تعاون کو مزید فروغ دینے اور مختلف دینی، علمی و ثقافتی شعبوں میں روابط کو مضبوط بنانے کے امور پر گفتگو کی گئی۔

ملاقات کے دوران امام اکبر   نے خادمِ حرمین شریفین، جناب  ملک سلمان بن عبد العزیز، اور ولی عہد، شہزادہ محمد بن سلمان، کی اُن عظیم خدمات کو سراہا جو وہ حجاجِ بیت اللہ   کی خدمت اور عرب و اسلامی اُمت کے مسائل کی حمایت کے لیے انجام دے رہے ہیں۔ انہوں  نے دعا کی کہ اللہ تعالیٰ مملکتِ سعودی عرب کی کوششوں کو کامیابی اور برکت عطا فرمائے، خصوصاً رواں سال کے حج انتظامات کو بہترین انداز میں انجام دینے میں۔ انہوں نے کہا  کہ حجاجِ کرام کی خدمت ایک عظیم سعادت اور شرف ہے، اور اس میدان میں سعودی عرب کی خدمات پوری اسلامی دنیا میں عزت و احترام کی نگاہ سے دیکھی جاتی ہیں۔

دوسری جانب سعودی سفیر نے شیخُ الازہر سے ملاقات پر خوشی کا اظہار کرتے ہوئے اسلام اور مسلمانوں کی خدمت کے لیے امام اکبر   کی گراں قدر مساعی کو خراجِ تحسین پیش کیا۔ انہوں نے اس امر پر زور دیا کہ مملکتِ سعودی عرب اور ازہر شریف کے درمیان تعلقات نہایت گہرے، مضبوط اور تاریخی نوعیت کے حامل ہیں، جو ہمیشہ علم، اعتدال اور دینی خدمت کے رشتے سے جڑے رہے ہیں۔ مزید انہوں   نے الازہر کے اُس عالمی کردار کو بھی سراہا جو وہ اعتدال، رواداری، مکالمے اور اقوام کے درمیان پُرامن بقائے باہمی کے فروغ کے لیے ادا کر رہا ہے۔ انہوں نے اس عزم کا اعادہ کیا کہ مملکت مختلف علمی، دعوتی اور ثقافتی میدانوں میں ازہر شریف  کے ساتھ تعاون کو مزید وسعت دینے کی خواہاں ہے، تاکہ امتِ مسلمہ کے مسائل کے حل اور اس کے استحکام و اتحاد میں مؤثر کردار ادا کیا جا سکے۔